آرمان تبریز-لای – لای… بایاتیلار— حمید آرش آزاد
لای- لای، اوشاغیم، لای- لای
گوللو بوداغیم، لای- لای
گئنه برقلر گئدیب
سؤنوب چیراغیم، لای- لای!
*
جانین سُرورو، لای- لای
گوزلرین نورو، لای- لای
بیرکیلو یوْغورت آلدیم
سو تک، دوم- دورو، لای- لای
*
منه «جان» دئیهن، لای- لای
قورو سود یئیهن، لای- لای
گئدهسن مدرسهیه
وئرهم شهریهن، لای- لای
*
لای- لای چاللام، یاتارسان
قیزیل گوله باتارسان
دانشگاها گئدهنده
قاب- قازانی ساتارسان
*
قنددانیم قندی، لای- لای
جانیم کمندی، لای- لای
تزه یاماقلار سالدیم
سوفرا رنگلندی، لای- لای
*
دریامدا بالیق، لای- لای
قوْروسون خالیق، لای- لای
سنه هر زاد آلارام
قوْیسا باهالیق، لای- لای
*
ائوین گؤزهلی، لای- لای
سؤزو مزهلی، لای- لای
یوز ایلده داها دؤزسن
ایشلر دوزهلی، لای- لای
لینک کوتاه :
https://www.armantabriz.ir/?p=6819
